公共圖書館逾期還書 罰款拖足12年 大頭蝦港媽甘心被罰呢個銀碼

在公共圖書館借書逾期未還，往往都是無心之失。港媽早前在社交平台以「公共圖書館逾期圖書12年先還錢。今次真係贏咗99%香港人」為題發帖，上載還款單據。講述自己罰款拖足12年未還的大頭蝦經驗；同時自爆因為一個理由，心甘情願被罰呢個數目。
根據「香港公共圖書館」網站，逾期歸還圖書館資料，每項成人圖書館資料及資料附件每天1.5元，最高罰款額130元。
從樓主上載的單據見到，過期罰款的金額為99元。據樓主自己解釋，「點解係$99，唔係$130？係因為當年見到有本書喺屋企無還，就求其放落去圖書館還書箱。12年後借唔到書先還錢，大家唔好學」。
網民對樓主的情況大感好奇，指「12年先$99，真心平喎」、「呢12年可唔可以出入境？」，樓主輕鬆回應指：「又無事喎，可以去旅行」。
另有人查問「點解仲搵到（本書）」，樓主指：12年前還咗書但無俾罰款 」。
鑑於樓主用了「今次真係贏咗99%香港人」的潮語，引出了屬餘下1%的網民發言，分享同類經驗：
•我係嗰1%。上兩個月終於還咗，22年……無記錯封頂價係$130。  
•我細個大約3-4歲借咗本書，到依家30幾歲都未還。
•我阿叔，巿政局年代借咗書冇還，而家都唔敢入公共圖書館。
•我都有本韓文書應該13-15歲時借，而家29歲都未還，唔知罰幾錢。
•我試過搵唔返本書報失咗，過咗幾年搬屋搵返，依家本身都仲keep（保留）係屋企。
對於獲讚「有借有還大丈夫」，樓主坦言：唔可以俾個女學呀媽啲衰嘢囉」。